AR ôl sawl blwyddyn i ffwrdd o berfformio, mae canwr-gyfansoddwr a chyfarwyddwr ffilm o Ogledd Cymru, Dïon Wyn, yn dychwelyd gyda I’r Diwedd (To The End) – ffilm sesiwn fyw ac E.P., wedi’i recordio mewn un noson.

Yn 2020, roedd ei fand The Routines newydd ryddhau eu halbwm cyntaf ac ar fin chwarae haf llawn o wyliau ar draws Prydain – tan i Covid stopio’r cyfan.

“Roedden ni newydd ryddhau ein albwm cyntaf fel The Routines ac ar fin chwarae haf o festivals mawr — efo rhai o’n heroes ni, popeth roedden ni wedi gweithio amdano am flynyddoedd — wedyn daeth Covid â’r cyfan i ben, fel gymaint o fandiau eraill,” meddai Dïon.

“Ond ar ôl ‘neud yr albwm a hyn yn digwydd, mi oni’n wâg, a dw i heb berfformio’n iawn ers hynny.

“Doedd gwneud y ffilm yma ddim yn fan cychwyn, ond yn ffordd o orffen y bennod — ar fy nhermau i, os ta’r diwedd yw hyn.”

Recordiwyd y ffilm yn ei ystafell fyw, mewn un noson heb ail gymryd, ac mae’n cynnwys pum cân wreiddiol — storiâu personol ac arsylwadol yn Gymraeg a Saesneg.

“Do’n i ddim eisiau ymarfer o i farwolaeth,” ychwanega. “Roeddwn i eisiau iddo deimlo’n onest – un take, dim ond fi yn yr ystafell.

“Dyna yw’r ffilm hon: y fersiwn fwyaf crai o’r caneuon, a fi fy hun.”

Bydd I’r Diwedd (To The End) yn cael ei ddarlledu ar YouTube ar 2il o Orffennaf, gyda isdeitlau dwyieithog ar gael.

Bydd yr EP ar gael ar yr un diwrnod ar bob platfform ffrydio mawr, gan gynnwys Spotify, Apple Music, Amazon ac ati.