Mae Urdd Gobaith Cymru yn falch o gadarnhau mai Nia Bennett yw Cadeirydd newydd Bwrdd Ymddiriedolwyr a Rheoli’r Urdd, a bod dau aelod newydd wedi’u penodi yn Ymddiriedolwyr Ifanc yr Urdd, sef Deio Siôn Llewelyn Owen ac Emily Pemberton.

Meddai Siân Lewis, prif weithredwr yr Urdd: “Rydym yn falch iawn o groesawu Nia Bennett i gadeirio Bwrdd yr Urdd ac i adeiladu ar y cyfraniad enfawr a wnaed gan Dyfrig Davies, sydd wedi cefnogi’r Urdd drwy newidiadau Llywodraethiant sylweddol. Hoffwn hefyd estyn croeso cynnes i Emily a Deio i Fwrdd Ymddiriedolwyr y Mudiad.

“Wrth i’r Urdd ddatblygu a ffynnu, mae’r penodiadau newydd hyn yn sicrhau ein bod yn parhau â’n taith o fod yn sefydliad blaengar.

“Mae amrywiaeth o safbwyntiau, ystwythder yn ein penderfyniadau ac ystod eang o sgiliau perthnasol yn hanfodol i gyflawni ein strategaeth ‘Urdd i Bawb’.

“Yn dilyn 18 mis o drafod, ymgynghori a diwygio mae strwythur Llywodraethiant newydd yr Urdd eisoes yn ei le. Drwy agor y rhwyd yn ehangach rydym wedi croesawu dros 70 aelod newydd i’n Byrddau Strategol, er mwyn sicrhau fod gennym yr arbenigedd angenrheidiol i gefnogi gwaith y Mudiad wrth symud ymlaen.

“Mae parchu lleisiau ein hieuenctid wrth wraidd ein strwythurau newydd, felly yn ogystal â phenodi dau Ymddiriedolwr Ifanc newydd, mae 38% o aelodau ein Byrddau bellach rhwng 18 a 25 oed ac yn ganolog i drafodaethau a chyfeiriad yr Urdd i’r dyfodol.”

Mae Nia Bennett yn cymryd yr awenau fel Cadeirydd yr Urdd gan Dyfrig Davies, sy’n camu yn ôl wedi chwe blynedd wrth y llyw.

Ar achlysur ei phenodiad meddai Nia Bennett: “Rwy’n awyddus i sicrhau bod yr Urdd yn gwbl gynhwysol, yn ymestyn ei gyrhaeddiad ac yn parhau i ddatblygu a gweithredu ar syniadau ein pobl ifanc. Drwy gynnig cyfleoedd i bawb - beth bynnag eu cefndir - i ehangu eu sgiliau a’u profiadau, rydym yn cyfrannu at ddatblygiad Cymry’r dyfodol, a thrwy hynny dyfodol Cymru.”

Ganed Nia yn Bolton a’i magu yn Llanfairpwll, Ynys Môn. Wedi cyfnodau o fyw yn Aberystwyth, Y Felinheli a Brwsel, ymgartrefodd Nia yng Nghaerdydd lle magodd dri o blant a gweithio yn y maes Cynhwysiant ac Adnoddau Dynol cyn cael ei phenodi yn Gyfarwyddwr Corfforaethol. Erbyn hyn mae Nia yn Gyfarwyddwr cwmni effectusHR, ac yn ymgymryd â gwaith prosiectau Adnoddau Dynol ac Anogi Uwch Reolwyr.

Nid yw Nia yn un i laesu dwylo. Bu iddi ymgymryd â sawl rôl wirfoddol gyda Chylch Meithrin Nant Lleucu yn y Rhath a bu’n Gadeirydd Llywodraethwyr Ysgol y Berllan Deg. Bu’n aelod o Banel Adnoddau Dynol yr Urdd ers 2011 ac yn Gadeirydd y Panel ers 2018. Bu i Ymddiriedolwyr yr Urdd ei chyfethol fel aelod o Bwyllgor Gwaith Gweithredol yr Urdd yn 2020, a chafodd ei hethol fel Ymddiriedolwr yn 2021. 

Derbyniodd yr Urdd 22 o geisiadau gan bobl ifanc 18-25 oed ledled Cymru oedd yn awyddus i eistedd ar Fwrdd Ymddiriedolwyr y Mudiad. Yn dilyn proses ffurfiol o gyfweliadau, mae Emily Pemberton a Deio Siôn Llewelyn Owen wedi’u penodi yn Ymddiriedolwyr Ifanc yr Urdd.

Daw Emily Pemberton o Grangetown, Caerdydd ac mae’n gweithio fel Cydlynydd Cydraddoldeb, Amrywiaeth, a Gwrth-hiliaeth i’r Coleg Cymraeg Cenedlaethol. Yn aelod o’r Urdd ers dyddiau ysgol, cyfrannodd at Neges Heddwch ac Ewyllys Da yr Urdd 2023 a thrwy hynny bu’n ymweld â Alabama union 60 mlynedd ar ôl ffrwydrad Eglwys y Bedyddwyr ar 16th Street, Birmingham er mwyn adeiladu ar y berthynas rhwng y ddinas a Chymru.

Meddai Emily: “Diolch i’r Urdd, gawsom ni brofiadau unigryw iawn yn Alabama wrth i ni ddysgu a dod yn ymgyrchwyr dros wrth-hiliaeth ar y lefel rhyngwladol. Dydw i methu meddwl am unrhyw brofiad arall gall fod mor werthfawr i unigolyn o fy nghefndir fel menyw Du Cymraeg.

“Dw i wedi fy ysbrydoli gan yr hyn sydd gan yr Urdd ar waith, a hoffwn barhau i godi statws yr agenda cydraddoldeb er mwyn gweithio tuag at Gymru lle mae’n pobl ifanc yn ddinasyddion byd-eang, yn profi cenedl well, ac yn ffynnu.”

Yn wreiddiol o gyrion Pwllheli, Penrhyn Llŷn, mae Deio bellach yn byw yn y brifddinas ac ef yw Is-Lywydd Iaith Diwylliant a Chymuned Cymru cyntaf Undeb Myfyrwyr Caerdydd, ble mae hefyd yn ymddiriedolwr o’r Undeb a Phrifysgol Caerdydd. Mae ei brofiadau o fod yn aelod o’r Urdd yn amrywio o glybiau ar ôl ysgol, cystadlaethau chwaraeon, cystadlu yn yr eisteddfod fel disgybl ysgol cynradd a myfyriwr Prifysgol.

Meddai Deio: “Mae cael bod yn aelod o’r Urdd dros y blynyddoedd wedi bod yn amhrisiadwy i fi, ac wrth gamu fewn i’w ail ganrif o fodolaeth, rwyf am weld y Mudiad yn parhau i ffynnu ac ehangu gorwelion cynifer o blant a phobl ifanc â phosib.”